Góð veiði á sjóbleikju, urriða og laxavon

Mikil laxavon er á öllum þessum svæðum fyrst neðst og svo á efri svæðunum þegar líða tekur á sumarið. Þetta er virkilega spennandi kostur fyrir þá sem vilja komast í góða silungsveiði með mikla laxavon.

Silungasvæðið okkar sívinsæla í Breiðdalsá verður veitt að venju frá 1. maí til 30. júní með sex stöngum fyrst og síðan fjórum stöngum eftir það til 30. september. Helgast það af því að á fyrri hluta veiðitímans er veitt á stærra svæði með staðbundnum urriða í Breiðdalsá ofan Beljanda og því rúmt um stangirnar, jafnvel þó að þær standi allar vaktina í sjóbleikjunni neðst á svæðinu. Veiðisvæðið samanstendur því af ósnum neðst í ánni ásamt svæðum efst í bæði Breiðdalsá og Norðurdalsá. Þessi svæði eru góð í urriða sem og bleikja gengur upp í Norðurdalsá þegar líða fer á sumarið. Mikil laxavon er á öllum þessum svæðum fyrst neðst og svo á efri svæðunum þegar líða tekur á sumarið. Þetta er virkilega spennandi kostur fyrir þá sem vilja komast í góða silungsveiði með mikla laxavon.

Þetta er fyrir löngu orðinn afar vinsæll pakki hjá okkur og hópar eru í vaxandi mæli að leita eftir því að taka sömu daga að ári. Vissulega eru veður rysjótt snemma á vorin en fiskurinn er til staðar og getur tekið grimmt, auk þess sem menn falla gersamlega fyrir veiðihúsinu okkar að Eyjum og mögnuðu umhverfinu í Breiðdalnum. Eindæma náðugt er að dvelja þar ef kuldinn nístir, skella sér þá bara í gufuna eða heita pottinn!

Það þykir mörgum langt að aka austur í Breiðdal frá Reykjavík. En nú er hægt að taka veiði jeppa á leigu á Egilsstaðaflugvelli á hóflegu verði og stytta þar með ferðatímann umtalsvert og spara líka ferðakostnað! Tilvalið er fyrir 3-4 veiðimenn að sameinast um einn jeppa og þar með eru veiðimenn á leið í Breiðdal komnir í veiðihús eftir rúma tvo tíma frá Reykjavík.

  • Staðsetning:  Fjarlægð frá Reykjavík: 615 km. Fjarlægð frá Egilsstöðum: 80 km.
  •  Veiðisvæði:  Veiðisvæðið sem um ræðir er víðfemt og síbreytilegt. Í vorveiðinni frá 1. maí – 30. júní er veitt bæði neðst á ósasvæðinu og að og með Eyjanesi, sem og efst í Breiðdalsánni sjálfri þar sem hún líður rólega um efri hluta Breiðdals ofan Efri-Beljanda. Frá 1. júlí og út veiðitímann breytast þessi efri svæði og færast ofar en á sama tíma kemur einnig efra svæðið í Norðurdal inn og laxveiðivonin stóreykst.
  •  Tímabil:  1.maí – 30.september.
  • Veiðileyfi:  Hægt að kaupa heila eða hálfa daga, eða 2-3 daga holl, allt eftir óskum veiðimanna og stöðu lausra leyfa.
  •  Daglegur veiðitími:  Veiðimenn mega haga veiðitíma að eigin óskum en þó innan 12 stunda ramma á hverjum sólarhring á ósasvæðinu en á öðrum svæðum ofar í ánni má veiða á bilinu kl. 7-13 og kl. 16-22 og síðsumars kl. 15-21. Brottfarardag skal veitt til kl. 12:00.
  •  Fjöldi stanga:  Leyfðar eru 6 stangir um vorið en síðan eru 4 stangir leyfðar fra 1. júlí.
  •  Verð:  Stöng á dag er kr. 15.000 og gisting er ekki innifalinn en hægt að fá aukalega eftir nánara samkomulagi.
  • Veiðireglur:  Leyfilegt agn er  fluga, spónn og maðkur og skyllt er að sleppa aftur löxum 70 cm og stærri. Leyfilegt er að hirða tvo laxa á stöng á dag undir þeim mörkum og einnig allan silung.
  • Vinsælar flugur:  Hinar ýmsu straumflugur hafa verið að gefa vel í bleikjunni og ber þá helst að nefna bleikjuflugur Súdda veiðivarðar. Straumflugur hafa líka gefið vel í urriðann í byrjun sumars og þá sérstaklega þær sem gætu líkt eftir laxaseiðum. Þegar líða fer á sumarið fara púpur og þurrflugur að gefa vel. Fyrir lax er Sunray Shadow, Rauð Frances í ýmsum útgáfum að virka vel, og ekki má gleyma líka Snældunni.
  •  Veiði síðastliðið ár:  Um það bil 2 laxar, 150 sjóbleikjur og 500 urriðar/sjóbirtingar.
  •  Umsjónarmaður/veiðivörður:  Sigurður Staples (Súddi) Sími 660 6894 og 475 6776.
  •  

Veiðihús vorveiði 1. maí -30. júní: Á bökkum Breiðdalsár, í landi Eyja sem eru neðarlega við ána, er nýlegt veiðihús sem býður upp á eina glæsilegustu gistiaðstöðu á landinu. Átta tveggja manna uppbúinn herbergi, hvert með sérbaðherbergi, gervihnattasjónvarpi og internettengingu. Þar af bíður glæsisvíta þeirra sem virkilega kunna að vera góðir við sjálfa sig. Í húsinu er gufubað og þaðan er útgengt í heitan pott. Borðstofa og setustofa eru með konunglegum aðbúnaði þar sem glæsilegur arinn er áberandi ásamt uppstoppuðum fuglum og fiskum á veggjum. Stór verönd er með grilli og góðri aðstöðu til útiborðhalds. Glæsilegt útsýni er yfir ómótstæðilegan fjallahring Breiðdalsins. Hundahald er EKKI leyfilegt í húsinu. Síminn þar er 475 6776. Gisting er ekki skylda í veiðihúsinu en hægt að fá gistingu eftir nánari samkomulagi. Tilboðsverð eru í boði fyrir hópa. Flestir kjósa að elda sjálfir og hafa allan aðbúnað til þess en ef óskað er geta silungsveiðimenn fengið tilboð með fullu fæði og þjónustu.

Frá Veiðihúsinu Eyjar þar sem einstaklega vel fer um silungsveiðimenn.

Veiðihús 1. júlí -30. september: Ekki er skyldugisting en oft er hægt að fá herbergi í veiðihúsinu og kaupa þjónustu þar líkt og laxveiðimenn fá. Einnig er möguleiki að gista í uppbúnu herbergjum í gistigámum rétt hjá veiðihúsinu og hafa þá til afnota baðherbergi í sjálfu húsinu og með eða án fæðis. Verð fer eftir nánari samkomulagi.

Ágæt herbergi er einnig hægt að fá í gistigámum rétt hjá veiðihúsinu.