Frá Jón Eyfjörð

Jæja, þá erum við komnir í bæinn eftir ánægjulega dvöl við Minnivallalæk. Við vorum nú frekar latir við veiðar, enda aðstæður ekki upp á það allrabesta, rok, rigning, sól og skítakuldi.

Við settum í nokkra urriða, suma stóra og aðra minni en okkur tókst samt ekki að landa nema 3 . Talsvert var af fiski við Arnarhólsflúð og Hólmakvíslum og að sjálfsögðu í Stöðvarhylnum. Hann var reyndar lítið stundaður, þar sem við notuðum þessa fáu tíma sem við eyddum á degi hverjum við veiðar, á öðrum, náttúruvænni veiðistöðum. Við misstum ágæta fiska, bæði við Arnarhólsflúðina og í Hólmakvíslum og auk þess slapp einn stór sem tók á flugu sem nefnd er Garðurinn (stór streamer, hnýttur úr afgangsfjöðrum alls konar fugla í Húsdýragarðinum) á Húsabreiðu. Urriðinn var að taka mjög grannt og allir þeir fiskar sem landað var voru þannig að flugan hékk á lítilli roðtætlu í eða við neðri skolt.

Við erum hæst ánægðir með túrinn, aðstaðan er frábær og við skemmtum okkur konunglega. Ég hef mikinn áhuga á að komast aftur í lækinn, þegar fer að hlýna meira og mun setja mig í samband við þig þegar fer að vora meira.