Laxá í Aðaldal var opnuð í norðan garra og rigningu í morgun og settu Laxamýrabændur í fjóra laxa og lönduðu þar af tveimur, 9 og 13 punda. Tóku laxarnir Sunray Shadow í Sjávarholu og Black Sheep túpu í Bjargstreng. Orri Vigfússon var á staðnum og sagði hann erfitt að átta sig á því hvort mikið eða lítið hafi verið af laxi því veður leyfði ekki að skyggnt væri af nokkru viti.

Hins vegar geta viðskiptavinir Strengja glaðst yfir því að sá óvenjulegi atburður gerðist, að lax var mættur strax í opnun á Nes- og Árnes veiðunum. Einn þeirra er opnaði ána í morgun setti í fallegan tveggja ára bolta í Þvottastreng. Að vísu lak sá silfraði af, en það var ekki heila málið, heldur að hann er mættur á svæðið óvenju snemma og veiðimaðurinn fékk mikið útúr glímunni!