Minnivallalækur hefur tekið vel við sér eftir einstaklega erfiðan mai-mánuð. Miklir vorkuldar líkt og voru í mai eru ekki heppilegir lengst uppi í Landssveit og veiðin var treg. En þetta er allt að koma, enda er fiskurinn til staðar, og heildartalan er núna um 200 fiskar. Einn útlendingur sem var hjá okkur fyrir skemmstu var með 31 urriða á fjórum dögum og notaði bæði púpur og þurrflugur niður í númer 22.

Hvolsá og Staðarhólsá hafa verið illa nýttar, en samt eru komnar um 80 bleikjur á land og veiði verið góð í Lóninu neðst á veiðisvæðinu, en einnig hefur orðið vart við fiska í einstökum hyljum þar rétt fyrir ofan, t.d. í Brunnafljóti.

Ef við vindum okkur aftur að laxasvæðum Strengja, þá eru gönguseiðin í sleppitjörnum við Hrútafjarðará sem óðast að búa sig til brottfarar. Metveiði var í Hrútunni í fyrra og var t.d. tjörn neðan þjóðvegar að skila góðri veiði, en stórveiðin snérist ekki eingöngu um gönguseiðasleppingarnar því ljóst var að náttúrulegi stofninn var einnig að skila sterkum árgangi. Áin var kjaftfull af laxi á síðasta veiðidegi og þá veiddist m.a. grálúsugur 18 punda hængur sem fór að sjálfsögðu í undaneldið. Hrútan opnar 1.júlí, líkt og Breiðdalsá, Selá í Álftafirði og Laxá í Nesjum, en þær tvær síðastnefndu eiga að skila a.m.k. 200 löxum hvor í sumar á tvær dagstangir. Nes- og Árnessvæðin hafa hins vegar þegar verið opnuð, þar hófst veiði í gærmorgun líkt og neðar í Laxá. Það skemmtilega var, að menn settu strax í lax þar efra, sem er fremur óvenjulegt hin seinni ár, en lofar að sjálfsögðu góðu fyrir vertíðina. Laxinn, sem var í Þvottastreng, slapp að vísu, en það er vitneskjan um að hann sé komin sem er svo dýrmæt.