Nokkrir erlendir veiðimenn  voru í Tungulæk á vegum Strengja í vikunni og var veiðin góð. Á tveimur og hálfum degi veiddi hópurinn 92 birtinga, mest spræka 3 til 5 punda geldfiska, en einnig slatta af stærri hrygningarfiski og var sá stærsti líklega sá allra stærsti á þessu vori. Var það hængur, 92 cm. Annar fiskur, 80 cm og einnig hængur, veiddist líka og voru báðir í ágætu ásigkomulagi. Sá stærri hefur ugglaust verið um eða yfir 20 pund sl haust.

Fallegur birtingur úr Faxa!

Örn Sigurhansson leiðsögumaður og veiðikonan Sarah með þann stóra.

Það var kona, Sarah Ingram Hill, sem veiddi tröllið á flugu neðst í Faxanum. Veiðin gekk í bylgjum, lá stundum niðri, en þess á milli komu miklar tökuhryðjur, t.d. á miðvikudagsmorguninn, er veiðimenn tóku 25 fiska í beit í Holunni. Annars var fiskur um allt hið hefbundna vorsvæði, frá svokölluðum Gussa og niður í Frystikistu, sem er neðst í skilunum við Skaftá.