Erfitt hefur verið um veiði vegna veðurs undanfarið, en þó fengu holl í vikunni í Minnivallalæk og Breiðdalsá góðan afla.

Í Breiðdal voru dagana 23-25 maí þrír veiðimenn sem ekki bara náðu boltableikjum, heldur líka vænum urriðum líka(sjá myndir). Veiddust þeir á neðstu veiðistöðum árinnar ofan við leirurnar, í Lambabakkahyl og Eyjanesi.
Og þar sem þeir voru óvenju bjartir töldu menn jafnvel að þetta væru sjóbirtingar og í óvenju góðum holdum. En líklegt má telja að þetta sé sami urriðinn og er í Skipakíl, sem hefur aðgang að sjóblönduðu vatni rétt fyrir neðan og það gerir hann bjartari en ella. En hreistursýni voru tekin og kemur það þá í ljós síðar við lestur þeirra.

Mjög erfitt hefur verið í Minnivallalæk vegna veðurs og kulda. En þó datt inn góð veiði á hollið líka dagana 23-25 maí. Náði það 10 fiskum, flesta á litlar púpur veitt uppstreymis með tökuvara, en einnig með straumflugum. Og einn náðist jafnvel á þurrflugu, sá var 60 cm langur og var eftirminnileg viðureign áður en honum var sleppt aftur.