Eftir góða byrjun dalaði veiði verulega í maí bæði í Minnivallalæk og á silungasvæði Breiðdalsár.

Apríl var mjög góður í Minnivallalæk en stífar norðanáttir og kuldi hafa verið nánast samfellt flesta daga síðan þá og það kemur niður á veiði. Hefur verið að kroppast upp einn og einn fiskur á dag við erfið skilyrði. Þó rofi aðeins til virðist vatnið vera kalt og þarf alvöru hlýindi og líklega úrkomu til að koma hreyfingu á fiskinn.
Sama sagan er  í Breiðdalsá. Frábær veiði var í hitabylgju í byrjun maí er veiði hófst, og mikið vart við sjóbleikju bæði við Brú og upp við Neðri-Grjóttanga. Veitt hefur verið flestar helgar síðan þá en aðstæður erfiðar, kalt, rok og lítið vatn. Þó hafa komið skot, einn daginn fengust 20 bleikjur en svo datt allt niður í sama farið.

En það spáir hlýnandi og allar líkur á að staðan breytist með suðlægum áttum næstu daga og þá ætti að færast fjör í veiðina aftur.