Það hefur gengið upp og niður í Minnivallalæk í vor, enda aðstæður oft erfiðar í kulda og roki, en þó hafa menn verið að setja í þá stóra eins og þessi pistill sem ég fékk frá Brjánn Bjarnasyni sem var þar um sl. helgi segir frá:  „Það sem ber auðvitað hæst úr þessari ferð var 80 cm höfðinginn sem veiddist tvisvar. Hann veiddist fyrst á fimmtudagskvöld í Stöðvarhyl. Þá kastaði veiðimaðurinn Þórir Júlíusson, frumhnýttri straumflugu út í flúðirnar ofan við hylinn og sagði um leið við makkerinn sinn að ef hún gæfi fisk myndi hann skíra fluguna í höfuðið á honum. Fiskurinn tók strax og rauk niður á breiðuna. Eftir nokkra baráttu tókst makkernum að stinga sér undir fiskinn og moka honum á land. Hann mældist 80 cm. Fiskurinn var með ljótt sár utan á skoltinu, nokkuð nýlegt, rautt enn en það blæddi ekki. Fiskurinn var nokkuð slappur og tók það 30 mínútur að pumpa lífi í hann og synti hann að lokum burt rétt ofan við Brúarstrengi. Þess ber að geta að flugan heitir nú Bússi í höfuðið á makkernum sem stakk sér svo hetjulega í lækinn til að ná fisknum á land. Daginn eftir prófaði annar veiðimaður, Þröstur Helgason, að kasta Black Ghost Zonker straumflugu í Brúarstrengina og neðst í hylnum var flugan negld. Eftir nokkra baráttu lönduðu þeir fiskinum sem reyndist vera sá sami og Þórir hafði tekið deginum áður, það var greinilegt bæði af sárinu og svo var hann rispaður eftir átökin. Mældist hann einnig nákvæmlega 80 cm. Það var ekki að sjá að þetta væri önnur baráttan hjá höfðingjanum á sólarhring og var hann hinn sprækasti og synti i burt eftir 10 mín. Þess má geta að bæði Þröstur og Þórir hafa áður veitt 10 punda fiska í Minnivallalæk, Þröstur í Stöðvarhyl sumarið 2006 og Þórir í Viðarhólma í apríl 2007.

Á laugardagskvöldinu þegar allir aðrir úr hollinu voru horfnir á braut og Þórir og Þröstur voru tveir eftir, kom loksins skaplegt veður og gátu þeir prófað andstreymisveiði sem hafði verið nánast ómöguleg fram að því. Um kvöldið skiptu þeir liði og Þórir var einn í Stöðvarhyl. Hann kastaði andstreymis á breiðunni, nokkurn veginn út frá kofanum og var með fjarka.

Fljótlega setti hann í fisk og fyrr en hann vissi af var fiskurinn kominn í flúðirnar fyrir ofan Stöðvarhylinn og undirlínan að rjúka út. Þórir rauk á eftir honum og þá rauk fiskurinn aftur niður úr, svona gekk þetta þar sem hann strikaði upp og niður og Þórir gat lítið gert nema fylgjast með. Að lokum náði hann að skófla fiskinum á land, mæla hann og smella einni mynd á farsímann sinn. Hann mældist 68 cm, en var mikill bolti og við bárum hann saman við myndir af fiskinum sem Þröstur veiddi 2006 og þurfti að farga en sá vigtaði 4,5 kg og leit þessi út fyrir að vera stærri. Fiskurinn var aftur tekinn á frumhnýtta flugu af Þóri sem hann hann nefndi "Tveir í Brúðkaupi" til heiðurs okkur tveimur sem þurftum að hverfa á braut. Aðrir fiskar sem komu á land voru þrír, 60 cm úr Drátthólshyljum og svo man ég ekki stærðirnar á þeim tveimur sem Brynjar tók, en þeir voru teknir í Viðarhólma og Hólmakvíslum, báðir á Black Ghost Zonker. Einnig er kannski vert að minnast á það að rétt áður en Þórir setti í seinni drekann sleit annar fiskur 13 punda taum hjá honum. Ég sjálfur missti svo fisk sem við ætluðum 8-9 pund alveg upp í landi eftir að hann hafði náð  að flækja línunni um slýbunka og líklega særa tauminn. Makkerinn var kominn með hendur á hann en missti hann og svo sleit hann, hefðum við verið með háf hefðum við náð honum.

Sem sagt frábær ferð í alla staði fyrir utan það að þurfa að fara fyrr heim og þessa bölvuðu norð-austan átt allan laugardaginn sem gerði það að verkum að það var gjörsamlega ómögulegt að upstreama og svo var rosalega kalt fyrir vikið.“

Í Breiðdalsá hefur verið mikið vatn og lítið bókað frá opnun 1. maí en þó fengust nokkrar bleikjur á eina stöng sem var við veiðar fyrir helgi. Loks um helgina var vatn alveg sjatnað og Súddi staðarleiðsögumaður ákvað að skella sér niður við Brú í dag og kanna hvað væri þar undir. Og hann var í geðshræringu er hann sló á þráðinn til mín síðdegis eftir 2 klst veiði. Þá hafði hann fengið 11 sjóbleikjur á ýmsar flugur og misst margar aðrar, og voru þær bæði vænar og í góðum holdum, allt að 4-5 punda þær stærstu! Og hann missti nokkrar „breddur“ sem tóku strikið niður í sjó undir brúna og fóru út með alla línuna áður en hann gat fylgt þeim eftir eða stöðvað þær, ýmist slitu eða rifu sig lausar þegar hann lét „sverfa til stáls“ og reyndi að stoppa rokurnar áður en öll línan væri farin út! Frábær byrjun og sérstaklega þegar haft er í huga að nú er smástreymt og þetta fjör var um miðjan dag, yfirleitt er best snemma á morgnanna eða á kvöldin í bleikjunni.

Frá Brú á silungasvæðinu þar sem Sigurður Staples (Súddi) lenti í ævintýri í dag. Þessi mynd var  reyndar tekin fyrir nokkrum árum og má sjá svipaða veiði og fékkst þar í dag hjá honum einum.

Lítið er bókað á næstu dögum og mun Súddi eflaust reyna aftur næstu daga þegar hann hefur tíma til, en nú eru „vorverk“ okkar hafin af fullum krafti, sem eru flutningur gönguseiða í sleppitjarnir í okkar laxveiðiár. Lítur vel út með seiðin og nú þegar er töluverður fjöld þeirra komin tjarnir í Breiðdalsá og stefnt er að því að klára að setja í aðrar ár í byrjun júní.