Það stefnir í frábært sumar miðað við ganginn í laxveiðinni þessa stundina. Breiðdalsá á miklu flugi og aðrar ár okkar sem eru rétt að hefja veiði lofa góðu.

Um 130 laxar hafa núna veiðst í Breiðdalsá sem er metveiði svona snemma sumars, og um helmingur aflans er núna smálax. Svo kröftugar stórlaxagöngur og  jafnframt snemmgenginn smálax er með eindæmum og ef framhaldið verður svipað stefnir í vel yfir 1000 laxa veiði þetta sumarið, enda er veitt til loka september.  
Veiðimenn eru að sjá svaka bolta víða í ánni sem slaga í meter eða meira. Einn slíkur sem var tæplega meter veiddist 18. júlí en sleppt aftur og skráður rúm 9 kg, kann þó að hafa verið mun þyngri og væri þá fimmti 20 pundarinn úr ánni ef svo væri. Sérstakt er að talsvert hefur borið á mjög smáum smálax í bland við þá stóru eða allt  niður í 1-1,5 kg sem er mjög óvenjulegt í Breiðdalsá. Hefur vantað millistærðina nema síðustu dagana að meira ber loks á hefbundnum 2-3 kg smálaxi.

Um 30 laxar hafa veiðst í Hrútafjarðará sem er bara gott miðað við það litla vatn sem hefur veriði í ánni undanfarið. Töluverður lax er komin í ánna og ef rignir verður veisla. Meira virðist líka vera af bleikju í Dumbafljóti en áður og hugsanlega er hún að koma til eftir niðursveiflu í nokkur ár.

Jöklusvæðið er komið á blað í laxveiðinni og hafa 3 laxar veiðst þar undanfarna daga. Lítið hefur þó verið reynt en Guðmundir Ólason veiðivörður fékk þann fyrsta í Laxá í jökulsárhlíð í fossinum og síðan hafa tveir aðrir veiðst í þeirri á. Einnig hefur verið sett í nokkra laxa í Kaldá og í Jöklu sjálfri sem er núna blátær en ekki náðst á land. Er þetta óvenjusnemmt, t.d. komu fyrstu laxarnir úr Laxá í fyrra í byrjun september! Nokkrir sjóbirtingar hafa líka veiðst þar. Sjóbleikjuveiðin i Fögruhlíðarós hefur verið frekar döpur það sem af er sumri,  en Kaldárbleikjan væna er farin að láta sjá sig. T.d. fengust 8 bleikjur í fyrradag við ósa Kaldár og Jöklu allt að 4-5 pund og allar á flugu.

Fyrsti laxinn veiddist í Laxá í Nesjum snemma í júlí og var það 15 punda hængur úr Ármótahyl á Sunray Shadow fluguna. Bændur hafa haft ánna það sem af er júlí en lítið hefur verið reynt. Nú verður veitt reglulega og þá koma fljótlega nánari fréttir af gangi mála.

Frábær gangur hefur verið hjá nokkrum útlendingahollum á góðviðrisdögum í júlí í Minnivallalæk. Eitt hollið var með um 60 fiska á litlar þurrflugur og púpur og allt að 11 punda urriði stærst! Black Gnat hefur gefið sérstaklega vel þessa dagana. Er urriðinn óvenju vænn þetta sumarið og mikið af 45-60 cm fiski sem er þá 4-7 pund.

Ennþá eru nokkur laus leyfi í flestum ám okkar nema í Hrútafjarðará sem er uppseld.

Vænn urriði úr Minnivallalæk núna í júlí.

Fyrsti laxinn af Jöklusvæðinu, Guðmundur með hann og í baksýn má sjá hluta af veiðihúsum sem þar eru í byggingu.