Það var vægast salt kalt er Aðalsteinn Jóhannsson og félagar hófu veiðar í Minnivallalæk að morgni 1. apríl, 11 stiga frost og rok!. Enda var dræm taka og það var ekki fyrr en aðeins hlýnaði síðdegis að það komu þrír fiskar á land. Daginn eftir komu fimm á land og í morgun er opnunarhollið lauk veiðum bættust við þrír fiskar svo samtals gaf hollið 11 fiska. Þeir stærstu voru 70 cm og í góðum holdum svo það gætu verið um 7-9 punda fiskar en öllu var sleppt og stærð því áætluð. Veiðin var nokkuð dreifð, veiðistaðirnir Húsabreiða, Stöðvarhylur, Djúphylur, Arnarhólsflúð og Arnarhólsbreiða gáfu fiska. Spáð er hlýnandi veðri og næsta vika gæti lofað góðu.

Laus leyfi hafa verið uppfærð á vefnum og ennþá er nokkuð um göt í vor í „Minni“ og því hægt að komast þar að í seinnihluta apríl og fram eftir maímánuði.