Það hefur gengið mikið á í Minnivallalæk eftir að fór að hlýna fyrir tveimur dögum. Þá var að veiðum hópur norskra veiðimanna í læknum sem þekkja hann vel og þeir lentu aldeilis vel í því er þeir fundu út hvað fiskurinn vildi taka. Best var að veiða djúpt uppstreymis með örlitlum en þyngdum púpum og fengu þeir 12-15 fiska þá á land en misstu fljölmarga. Ástæðan fyrir því var sú að stærðirnar á flugunum var allt niður í 18-22 og taumarnir þar af leiðandi 4-7 pund sem lítið höfðu í „risana“  að gera sem voru að taka flugurnar og slitu oftast eftir stutta stund. Sá minnsti sem náðist á land var áætlaður 3 pund en hinir allt að 70 cm fiskar og spikfeitir flestir og þá um og yfir 10-12 pund margir hverjir! Sá stærsti náðist á púpu af stærðinni 22! Veiðin var dreifð og töldu þeir mikið af stórum fiski víða um ánna.

Þeir luku veiði á hádegi í dag og við tók hópur íslendinga. Einn þeirra sem var að koma í fyrsta sinn, Sveinn Speight var nýbúinn að skipta úr 9 punda taum yfir í 15 punda þegar stórfiskur tók nú í kvöld Black Ghost flugu í Stöðvarhyl og eftir 30 mínútna viðureign náðist þessi svakalegi hængur sem sést hér á myndunum. Var hann 83 cm og áætlaður 15-16 pund líkt aðrir fiskar af þessari lengd (og breidd) hafa verið úr læknum. En myndirnar tala sínu máli og ánægðari veiðimann er varla hægt að ímynda sér.