Sumarið 2009 var mjög gott í Minnivallalæk, heildarveiðin tæplega 400 urriðar og margir sannkallaðir drjólar! Síðustu sumur hafa verið einhver mestu stórfiskasumur sem um getur í Minnivallalæk. Nokkrir um og yfir 10 punda urriðar veiddust og fjölmargir 3─4 kg einnig. Menn vita á hverju þeir geta átt von á í Minnivallalæk og hann er eitt af flaggskipunum okkar, einstök á sem á ekki sinn líka í flórunni hér á landi. En menn þurfa að vera opnir og athugulir til að komast í mjúkinn hjá þessari á. Þess eru dæmi að menn hafi komið í fyrsta skipti og lent strax í ævintýrum. Aðrir hafa þurft meiri tíma enda á  veiðiskapurinn í henni það til á stundum að verða tæknilegur og fiskur hvumpinn og dyntóttur.

En nálægðin við fiskinn og ótrúleg stærð einstakra urriða í ánni er það sem fær svo marga til að koma aftur og aftur. Árlega veiðast um og yfir 10 punda fiskar í ánni og vitað er að víða í ánni, t.d. á Húsabreiðu, í Stöðvarhyl og við Viðarhólma, svo að einhverjir staðir séu nefndir, hafa hreiðrað um sig urriðar sem eru varla af þessum heimi, tröll sem liggja á bilinu 7,5 til 10 kg. Menn hafa séð þá og menn hafa sett í þá.

Við viljum einnig benda mönnum á að æ fleiri eru að uppgötva að haustið getur verið gjöfull tími þar sem urriði er annars vegar. Urriði verður árásargjarn er nær dregur hrygningu, rétt eins og laxinn, og það voru hópar hjá okkur í Minnivallalæk í september 2009 sem veiddu mjög vel. Þetta er tími sem hefur verið illa nýttur í gegnum tíðina.