Einn nýrunninn lax úr Jöklu sjálfri en hún er nú orðin tær aftur.
Það hefur verið illa bókað á Jöklusvæðinu í viku eða svo þar til 5 stangir hófu veiðar þar síðdegis í gær. Og þá var Jökla sjálf óðum að tærast enda yfirfallið nýfarið af Hálslóni sem er óvenju snemmt að hausti til. En það var aldeilis fjör því fyrstu vaktina lönduðu stangirnar 9 löxum og var það bæði í hliðaránum og í Jöklu sjálfri sem veiðin var í.
Og veiðin var góð einnig í morgun er undirritaður hafði samband við einn veiðimanninn þar, hann mátti ekki vera að því að tala í símann því félaginn var með hann á, en hringdi eftir löndun og eftir örstutt samtal þurfti hann að skella á því annar lax var komin á stöngina! Og morgunvaktin setti í 10 laxa en landaði 6 og var það bæði smálax og stórlax að veiðast og þar af um helmingur nýr eða nýlegur.
Veitt verður til 30. september í öllum okkar ám og stefnir Jöklusvæðið ásamt Fögruhlíðará í um 400 laxa ef fram fer sem horfir. Og Breiðdalsá fer væntanlega nálægt 500 löxum og Hrútan í um 200 laxa miðað við stöðuna. Frábær endasprettur en þó ekki óalgengt þarna fyrir austan því lax er að ganga þar alveg inn í októbermánuð!
| Share |