Eins og víða voru laxveiðitölur í lærri kantinum hjá okkur einnig 2012, og ekki hjálpaði til einstaklega erfið skilyrði í júlí og ágúst. Aðstæður skánuðu í september er loks kom úrkoma, og lax var að ganga til lokadags 30. september í bæði Breiðdalsá og á Jöklusvæðinu.Og meðalþyngdin var góð, sérstaklega í Breiðdalsá eða tæp 5 kg þar og mikið um lax 80 cm og stærri. Í Hrútafjarðará komu ekki haustgöngur og lokatölur þar voru undir 200 löxum sem voru vonbrigði. Breiðdalsá endaði í 464 löxum sem er mikið minnkun frá metveiðisumrum undanfarina ára.Jöklusvæðið með Fögruhlíðará fór í 384 laxa samtals sem er ágætt veiði á stangirnar sex og alls ekki slæmt miðað við margar ár í sumar. Og hefðu þurrkarnir ekki leikið minni hliðarár Jöklu grátt í sumar og yfirfallið á Hálslóni komið í ágúst í stað september eins og var 2011, hefði veiðin verið síst minni en þá (565 laxar) og jafnvel meiri! Og frá 1. ágúst hóst regluleg veiði á göngufiski fyrir ofan Steinbogann þar sem var gönguhindrun og gerð rás þar svo fiskur kæmist alltaf upp Jökuldalinn. Margir glæsilegir nýjir veiðistaðir komu þá inn í veiðina og verður spennandi að fylgjast með landnámi laxins upp dalinn á næstu árum.
Silungsveiðin var almennt góð í okkar ám, sérstaklega á Jöklusvæðinu og Fögruhlíðarós. Bæði sjó- og staðbundin bleikja er í mikilli sókn þar og þá sérstaklega á efri hluta Jöklu sem ekki var áður. Bendir það til að skilyrði þar séu að stórbatna fyrir allan fisk enda er jökulvatnið nú aðeins stuttan tíma á hverju ári að koma úr Hálslóni. Reyndar var yfirfallið farið af síðustu vikuna í september og veiði þá ágæt þegar veitt var í sjálfri Jöklu, en ástundun var þó lítil þar í lokin. Og sjóbleikjan í Breiðdal var vænni í ár en oft áður, en var oft dreg til að taka og virtist hafa nóg æti á ósasvæðinu. Lítið veiddist af laxi á silungasvæðinu fyrr en um haustið er laxinn fór ofar á vatnasvæðið með hækkandi vatni. Minnivallalækur var með tæplega 300 urriða og þar af voru 8 fiskar á bilinu 5-8 kg! Eru það líklega fleirri af slíkri ofurstærð en verið hefur áður á einu sumri. Það er greinilegt að veiða og sleppa fyrirkomulagið er að auka fjölda þessarra sérstöku risa. Þeir sem koma í lækinn eru ekki alltaf að leita eftir mikilli veiði, heldur hinni sérstöku stærð á fiski sem þar er að finna.
Fyrir 2013 verður óbreytt verð og fyrirkomulag í Breiðdalsá, Hrútafjarðará og Minnivallalæk. Á Jöklusvæðinu verða breytingar, en þar verður vegna opnun laxastigans fjölgað stöngum á svæði Jöklu I og Fögruhlíðará um tvær frá 8. júlí og fram að miðjum ágúst. Fjölgað verður um tvö herbergi í Veiðihúsinu Hálsakot svo áfram fylgir eitt herbergi hverri stöng við fjölgunina. Einnig verður fjölgað herbergjum fyrir starfsfólk og öll aðstaða þess bætt. Á undan 8. júlí og eftir miðjan ágúst verður áfram óbreytt sex stangir á svæðinu. En það lengist að og með Hvannárbreiðu en þar er sleppitjörn sem lax safnast við. Í vinnslu er hvernig svæðinu þar fyrir ofan verður háttað 2013 eða Jökla II eins og það heitir, en þar var góð bleikjuveiði í sumar og væntanlega verður mikil laxveiðivon þar líka. Skýrist það fljótlega.
Bókanir eru hafnar fyrir 2013 og það væri gott að heyra í fastahollum sem fyrst því eftirspurnin virðist vera ágæt þrátt fyrir minni veiði þetta sumarið. Enda er verð veiðileyfa stillt í hóf hjá Strengjum miðað við margar aðrar sambærilegar veiðiár víða um land er óhætt að segja.
Hlakka til að heyra í ykkur,
Þröstur Elliðason
| Share |