06nov16a

Nú er verið að vinna í veiðibókum sumarsins og ljóst er að veiðin var vel viðunandi víða miðað við hvernig sumarið var almennt þar sem vantaði smálax víða.

BREIÐDALSÁ var nánast með sömu veiði á milli ára eða 375 laxa, en hefði væntanlega farið mun hærra ef ástundun í september hefði verið meiri en raun var. Byrjaði vel en dró af er leið á sumarið enda vantaði meira af smálaxi eins og víðar. En vænn stórlax og nokkrir um 20 pundin komu á land. Sjóbleikjuveiðin var tæplega 200 fiskar og hátt í 400 urriðar sem gerir þetta með bestu silungsveiðiám austurlands. Svo samtals veiddust því tæplega 1000 fiskar í heildina úr vatnakerfi Breiðdalsár.

06nov16b

JÖKLUSVÆÐIÐ kom ágætlega út, heildarlaxveiði 584 laxar og er þá talin með Fögruhlíðará sem gaf 100 laxa sem er met í þeirri á.Fylgir hún með Jöklu I svæðinu en Fögurhlíðarósinn er seldur sér og þar var mun einnig meiri bleikjuveiði en undanfarin ár. Aðrar hliðarár Jöklu voru í meðallagi, Kaldá og Laxá, og Jökla sjálf góð. Reyndar kom yfirfall seint í ágúst en annars hefði veiðin orðið meiri í Jöklu og einnig ef ástundun í september hefði verið meiri í þeim mánuði í hliðaránum. Á facebook síðu okkar má sjá nú nákvæmar tölur yfir veiði eftir veiðistöðum, svæðum, stærðum , tímabilum og fl og er til efs að svo nákvæmar  og frábærar upplýsingar hafi birst um eitt veiðisvæði áður, en Snævarr Örn Georgsson leiðsögumaður á veg og vanda að vinna þessar tölur úr veiðibókum. Með silungsveiðinni er heildarveiðin um 1000 fiskar einnig á Jöklusvæðunum líkt og í Breiðdalsá. Endurbætur voru gerða á veiðihúsunum við Hálsakot og öll aðstaðan er orðinn fyrst flokks sem hefur mælst mjög vel fyrir hjá veiðimönnum í sumar.

06nov16c

HRÚTAFJARÐARÁ gaf 551 laxa sem er líklega fimmta besta sumarið í sögu árinnar. Einnig eru 63 bleikjur skráðar í veiðibók sem er aukning frá fyrra ári. Veiðin byrjaði vel, góðar göngur af stórlaxi en svo um mitt sumarið hægði um þegar lítið vatn var í ánni, en rauk svo aftur upp er fór að rigna síðsumars og haust,svo flott vertíð á þessarri veiðislóð!

MINNIVALLALÆKUR gaf um 400 urriða sem er meira en undanfarinn ár og veðurfarið hentaði vel til þurrfluguveiða í sumar sem þessi á er fræg fyrir.Nýjir veiðistaðir komu inn ofan við veiðihúsið og fjölbreyttni svæðisins jókst þar með mikið.

Allt er komið á fullt vegna sölu næsta árs, fastaholl virðast ætla að halda öllum sínum dögum í Hrútafjarðará en getum boðið upp á lausar stangir í öðrum ám okkar og áhugasamir hafi samband sem fyrst með nánari upplýsingar um lausa daga.  .

Góðar stundir,
Þröstur Elliðason